L'articolo a cura di Lucia Gross della Usc di Ladins, è una mia breve intervista sui dieci anni di collaborazione con l'Almanach.
Do 10 egn se sera n zicle
Manuel Riz no jirà più inant:"L'é stat na bela colaborazion ma ades l é benfat mudèr". Dessegnadores ladins, fajeve inant!!!
La neva é ruèda enstadì, fora de n bel seren. Do aer manà en stampa l numer 10 del Almanach, l era jà ora de tachèr a se pissèr al prum numer de chest an. L prum passaje, desche semper, l é stat chel de confront anter la redazion de la Usc de Fascia e Manuel Riz, per pissèr al argoment e a la patofia per l meis de jené, ajache chest é n lurier che vegn fat meis per meis, fora per dut l an.
L é stat chiò che Manuel ne à dit chela che pissaane che sie una de sia matades... enveze l dijea dassen.
"L é 10 egn che l é peà via chest prjet con l'Union di Ladins e con la Redazion de la Usc de Fascia - à dit Manuel. al scomenz fosc no se se pissèa nience de jir inant tant al lonch, gé pissèe a na roba magari per 3 o 4 egn, enveze se è stac bogn de jir inant con na bela colaborazion.
Peisse che te chisc egn aon passà fora coi comics mingol duc i personajes e i argomenc maores de Fascia, che l é na val n muie viva ma ence picola, l é stat tout ca beleche dut e fossa l pericol de doventèr ripetitives. Per chest do 10 egn me é pissà che per me sie ruà l moment de me fermèr, de lascèr chest projet che é portà inant fin canche me é godù, piutost che jir inant e me troèr a l fèr zenza più gran estro creatif. Ence per l Almanach cree che na ocajion per mudèr e renovèr sie format".
Él stat n lurier senester? Te èles fat dir te la Redazion de La Usc?
"Stentèr no... l'é stat na colaborazion per me neva, per la esperienzes che é abù, gé de solit fae dut enstes, zenza ge domanèr nia a nesciugn, enveze te chest lurier l é stat n confront, che fèsc vegnir fora idees, ence discuscions vèlch outa, ma fèsc pèrt del lurèr te na redazion e l deida ence a madurèr e a emparèr zeche da nef.
L lurier se cogn dir che l é empegnatif, l é na roba belebon desferenta da la caricatura de Scedola per la Usc. la patofia del Almanach l é na storia, semper desvaliva ence per stel aldò del argoment, tedò a ogneuna l é n gran lurier e tirèr fora na idea ogne meis no l é sorì. Posse dir che son content che sion rué a chest bel zil".
Ei, do 120 patofies e 10 egn de Almanach se sera n zicle e chesta produzion, che à abù an per an maor seghit, meritassa de vegnir valorisèda. Ades de segur la mudarà e per l Almanach se cognarà troèr fora valgugn che vae inant zenza perder che spirit ironich che l'à caraterisèda te duc chisc egn.
"L Comic l é na maniera de comunicazion che l à si egn, l é nasciù a la fin del '800 ti Stac Unii, l é stat durà da tropes e l funzionea amò, ma l è ence de autra sort de comunicazion artistica che podessa raprejentèr na novità. Coche é jà dit pel esser na ocajion, per l Almanach per se renovèr e ence per vèlch joen che à gaissa de se meter en jech. Ence gé canche é scomenzà a fèr la caricatura chiò su La Usc no saee fèr: me é fat i osc, l é stat na palestra e ades l Almanach pel doventèr na palestra per i joegn artisć".
No ne resta donca che envièr jà da ades duc i joegn che à gaissa de se meter a la proa a se fèr inant con l'Union di Ladins de Fascia o la Redazion de la Usc di Ladins: l é segur na endesfida bela e prestigiousa!
.jpg)
.jpg)
