LA USC DI LADINS 30.5.2021

 
L'articolo a cura di Lucia Gross della Usc di Ladins, parla del progetto Street Alp presso il Centro Sportivo Cotura a San Giovanni di Fassa.
 
Street Alp, per engaissèr i studenc con l'èrt e l sport
 
N projet de la scola mesènes e del liceo artistich de Fascia con i professores Claus Soraperra e Manuel Riz fornesc l zenter de Cotura a Vich metan a frut la creatività di bec
 
L'é stat un lurier lonch, peà via amò acà doi egn e entardivà amò de più dal coronavirus, ma ades l'é ruà beleche al zil. Se trata de n projet che fèsc pèrt del program de #Fuoricentro "coltiviamo le periferie", che te Fascia à tout ite ence la Scola con la professora Cristina Donei desche referenta.
Chest projet, dal titol "Street Alp dal mur bianchal mur depent" l'é stat pissà da doi professores che de spes colaborea te sia scomezadives artistiches: Manuel Riz che ensegna a la Scola mesènes e Claus Soraperra del Liceo artistich. I doi ensegnanc à tout ite n grop de bec de la mesènes che aea enteress o che aessa podù aer joament da n percors per stimolèr sia creatività, e n auter grop de studenc più gregn, che fèsc l liceo artistich, con l'encèria de ge fèr da tutor per portèr inant adum l projet. L'obietif l'era chel de fornir con murales i parees beinc del zenter sportif de Cotura a Vich, destinà ence a doventèr la senta del nef "Bar educante".
L prum verech - ne à contà l professor Claus Soraperra - l'é stat chel de envièr i bec de la mesènes a pissèr a che dessegnes che ge piajessa fèr per chisc murales, e coscita l'é vegnù fora ne lingia de idees leèdes a fegures de sportives de ogne sort.
L percors é jit inant tel liceo, olache l'é stat fat n servije fotografich coi studenc empegné te desvaliva ativitèdes, ma regolé con guants leé al conzet de na "identità alpina" apontin aldò de l'inom "Street Alp", che straouc mingol chel de "Street Art" che caraterisea apontin chesta forma de èrt a l'averta. L'é stat fat la postproduzion e dapò, a cajon del Covid, i studenc de mesènes e liceo i à cognù lurèr sparii pe enjignèr duc i sciablons, che fossa i modìe de papier e carton che serf per fèr i stencil, te na sort de "negatif", olache la fegures cogn restèr vetes ajache dapò che vet cognarà vegnir empienì dal color sbicà sul mur.
L fin de setemèna  di 24 e 25 de oril dal lurier "dò via la coltrines" se é passé a la fasa de realisazion più publica e concreta: i bec de la mesènes à podù jir alò dal zenter de Cotura, meter sù i sciablons e depenjer la fegures. Semper per rejons de Covid i studenc più gregn no à podù tor pèrt ensema te chest moment: ic i jirà chesta setemènes che vegn a fenir l lurier, che ampò jà ades l vèrda fora dassen delvers, e l ge à dat na bela parbuda de viveza e color a chest zenter sportif.
Dassen na bela scomenzadiva, che sotrissea l'emportanza del raport anter scola e teritorie e la viventea i parees de Cotura, n zenter che travers la colaborazion percacenta anter aministrazions, scola, copratives sozièles e sociazions, con la spenta de #Fuoricentro, l'é destinà a doventèr semper de più n lech de crescimonia positiva per la joena generazions de noscia comunanza.